વિશ્વ પ્રસિદ્ધ જૈન યાત્રાધામ તેમજ કેન્દ્રીય મંત્રીનું ગામ પાલીતાણાના ઘણા વિસ્તારોમાં નગરપાલિકા દ્વારા પાયાની મૂળભૂત પ્રાથમિક સુવિધાઓ નો અભાવ અને અવગણનાને લઈને આજરોજ પ્રાંત કચેરીએ જાગૃત યુવાનો દ્વારા રજૂઆત કરવામાં આવી હતી જેમાં ખાસ વોર્ડ નંબર પાંચમાં પીવાનું પાણી અઠવાડિયામાં માત્ર બે દિવસ કે ત્રણ દિવસ આપવામાં આવે છે, ઘણી જગ્યાએ ગટર મિક્સ થઈ દૂષિત પાણી પણ આવે છે. આ ભયંકર ગંભીર બેદરકારી તેમજ ઘણા સમયથી ચાલી રહેલ અમૃત 2.0 પ્રોજેક્ટમાં ભ્રષ્ટાચાર થતો હોવાની ફરિયાદ કરવામાં આવી છે. આ સિવાય આખા શહેરમાં અનેક જગ્યાએ ગટર ઉભરાઈ રહી છે જેમાં ખાસ ધારાસભ્યની ઓફિસ પાછળ ભૈરવપરામાં, ઘેટી રોડ ગાયત્રી મંદિર પ્રાથમિક શાળા ની સામે, ઘેટી રીંગ રોડ ઉપર રહેમાનદાદા ની વાડી વિસ્તાર, બહારપરાથી લીંડિયામાં જવાના રસ્તે શેરીમાં ખુલ્લેઆમ ગટરના પાણી વહી રહ્યા છે જે લોકોના આરોગ્યને નુકસાન કરી રહ્યા છે. પાલીતાણા ના અંદરના વિસ્તારોમાં સફાઈ બાબતે ઘોર બેદરકારી છે. સફાઈ કર્મચારી આવતા જ નથી અથવા માત્ર તહેવારોમાં આવે છે અને ડોર ટુ ડોર કચરો લેવા ગાડી પણ આવતી નથી. જ્યાં આવે છે ત્યાં ખૂબ અનિયમિત છે જેની રજૂઆત કરવામાં આવી.
આ સિવાય નવા બનેલા રોડ રસ્તામાં મોટા મોટા ખાડા પડ્યા છે. અગાઉ જે ખાડા રીપેર કર્યા હતા એમાં પણ ભ્રષ્ટાચાર કરી માત્ર થોડા દિવસોમાં ફરી ખાડા પડી ગયા છે, તો આ તાત્કાલિક ખાડા પૂરવા માટે અને નજરે દેખાતા ભ્રષ્ટાચાર વિરુદ્ધ શિક્ષાત્મક પગલાં ભરવા માટે રજૂઆત કરવામાં આવી. આ સિવાય ઘેટી રિંગ રોડ રહેમાન દાદાની વાડી વિસ્તાર મુખ્ય રસ્તા ઉપર ભયંકર પાણી ભરાય છે, અકસ્માતનો ભય રહે છે જેનું કાયમી નિરાકરણ લાવવા માટે પણ રજૂઆત કરવામા આવી હતી. આ તબક્કે પ્રાંત અધિકારીએ નગરપાલિકાના ચીફ ઓફિસરને જાણ કરીને તેમજ પ્રાદેશિક કમિશનર ભાવનગરને પણ જાણ કરી તાત્કાલિક આ સમસ્યાઓનું સમાધાન થાય એ રીતે કાર્યવાહી કરવાની બાહેંધરી આપવામાં આવી હતી.આ રજૂઆત કરવા માટે પાલીતાણાના જાગૃત નાગરિક જનકભાઈ જીવાણી સાથે આશિષ નાવડિયા, ધવલ નાવડિયા, સાગર નાવડીયા, ભાવિન નાવડીયા, અલ્પેશભાઈ નાવડિયા, ઉમેશ નાવડિયા, રોમીક સવાણી,
વિશાલ ભાદાણી, વિશાલ નાવડિયા, બકુલભાઈ નાવડીયા, નીતિનભાઈ નાવડીયા, તુષાર નાવડિયા વિગેરે યુવાનો દ્વારા પાલીતાણા ને સ્વચ્છ, સુઘડ અને રળિયામણું બનાવવા, લોકોની સમસ્યાઓ નું નિવારણ કરવા માટે તાત્કાલિક પગલાં ભરવા આગ્રહ કરવામાં આવ્યો હતો..
